این پی آر اور پی بی ایس نیوز کے سروے میں کہا گیا ہے کہ امریکا کی نائب صدر اور ڈیموکریٹ کی صدارتی امیدوار کملا ہیریس اور سابق صدر اور ریپبلکن امیدوار ڈونلڈ ٹرمپ کے درمیان انتہائی کانٹے کا مقابلہ ہوگا۔
صدر بائیڈن کی جانب سے انتخابی مہم سے دستبردار ہونے اور کاملا ہیریس کی توثیق کرنے کے بعد رجسٹرڈ ووٹرز پر کیے گئے این پی آر اور پی بی ایس نیوز کے سروے میں ریپبلکن صدارتی امیدوار کی مقبولیت 46 فیصد جبکہ کملا ہیرس کی مقبولیت 45 فیصد ہونے کا دعویٰ کیا گیا ہے۔
سروے میں 9 فیصد ووٹرز کا کہنا ہے کہ انہوں نے تاحال فیصلہ نہیں کیا کہ کسے ووٹ دیں گے۔
اس طرح ڈونلڈ ٹرمپ کو اس وقت کملا ہیرس پر صرف ایک پوائنٹ کی برتری حاصل ہے اور سروے میں غلطی کی گنجائش بھی ہوتی ہے جس کی وجہ سے یہ معاملہ انتہا سے زیادہ سخت ہونے کا امکان بڑھ گیا ہے۔
یاد رہے کہ اس وقت ریپبلکن پارٹی اور ڈونلڈ ٹرمپ امریکا میں کرپٹو کرنسی کی ریگولیشن اور اڈاپشن کے حوالے سے انتہائی اہم سمجھے جا رہے ہیں۔ جس قدر یہ مقابلہ زیادہ ہوگا اسی قدر ٹرمپ کا جھکاؤ بھی کرپٹو اور دیگر متنازعہ معاملات میں زیادہ ہوگا۔
